Os dez edís de Terra Galega e os dous do PSOE conforman o equipo de goberno naronés
Narón, 19 de xuño de 2015.- O pleno do Concello de Narón aprobou no pleno celebrado hoxe, ás 10.00 horas, o reparto de delegacións entre os dez concelleiros de Terra Galega e os dous do PSOE, así como os representantes municipais nos diferentes organismos e entidades nos que está representada a administración local. A portavocía do grupo municipal de TEGA asumiráa Marián Ferreiro, número dous do partido na localidade e primeira tenente de Alcaldía.
O alcalde, José Manuel Blanco, encabezará nos vindeiros catro anos un equipo no que Marián Ferreiro se encargará das delegacións de Cultura e Relacións Institucionais; Manuel Ramos de Urbanismo; Natalia Hermida de Turismo, Formación, Novas Tecnoloxías e Mocidade; Pablo Mauriz de Obras Públicas, Persoal e Recursos Humáns; Guillermo Sánchez Fojo de Protección Civil, Seguridade Cidadá e Transporte Público; Mar Gómez de Feiras e Mercados, Festas e Estatística; Román Romero de Deportes; Mercedes Taibo de Ensino e Bibliotecas e Ibán Santalla de Servizos.
A portavoz socialista, Catalina García, será a responsable de Participación Cidadá e Acción Social e o concelleiro do PSOE Octavio Dopico o de Sanidade e Medio Ambiente.
O alcalde, José Manuel Blanco, continuará sendo o representante do Concello na Mancomunidade de Municipios da Ría de Ferrol.