Narón, 11 de febreiro de 2023. O Concello organiza unha campaña de Entroido dirixida ao sector hostaleiro local que se desenvolverá do 20 ao 26 deste mes. Así o avanzou o concelleiro de Promoción Económica, David Pita, que animou aos representantes do sector na cidade a anotarse, dende hoxe, nesta iniciativa a través do correo: me.mendez@naron.es. O prazo para anotarse rematará o vindeiro martes, 14 de febreiro. Pita explicou que a campaña se dirixe a trinta locais de hostalería, que recibirán cada un deles 200 papeletas “rasca e gaña” que entregarán coas consumicións á clientela. Algunhas delas teñen premios directos (bolígrafos, libretas, altofalantes para móbil, xogos de mesa, chaveiros) e, a maiores, cada un dos establecementos entregará unha “cesta de Entroido”, con cocido con lacón, grelos, cachola e chourizo para catro persoas. O concelleiro naronés animou aos hostaleiros locais a participar nesta campaña “a través da que queremos dinamizar o sector nesta tempada de Entroido e, de paso, premiar a fidelidade da súa clientela”.