Narón, 18 de abril de 2024. A compañía Sarabela Teatro representará este sábado no Pazo da Cultura, ás 20:00 horas, o espectáculo de teatro contemporáneo “O dragón de ouro”. A peza está ambientada nun edificio dalgún lugar de Europa cun restaurante de comida rápida ubicado no baixo e en cuxo local e os pisos superiores se suceden varias historias. Ánxeles Cuña dirixe esta obra, cun elenco artístico formado por Elena Seijo, Fernando Dacosta, Sabela Gago, Fran Lareu e Fina Calleja. Está dirixida a público adulto e ten unha duración de 70 minutos. As entradas dispoñibles poden adquirirse no despacho de billetes do Pazo ou na web do Padroado da Cultura (www.padroadodecultura.es) a un prezo de 9,50 euros para público xeral e de 6,65 para abonados, desempregados e persoas con carné xove ou de estudante (ata 25 anos).