A cita será ás 18.00 horas e diríxese a público familiar e infantil, con entradas á venda ata completar o aforo permitido pola nova Orde autonómica de 21 de outubro de 2020
Narón, 23 de outubro de 2020. O Pazo da Cultura acollerá este domingo, día 25, o espectáculo “Contos ao pé da cama”, da compañía Viravolta Títeres e dirixido a público familiar e infantil. A cita coas marionetas será ás 18.00 horas e as entradas están dispoñibles ata completar o aforo establecido polas nova Orde de 21 de outubro de 2020 da Xunta de Galicia con motivo da evolución da situación epidemiolóxica derivada da Covid-19. As entradas teñen un prezo de 9,50 euros para público xeral; de 6,65 para as tarifas reducidas (persoas abonadas, desempregadas e con carné xove ou de estudante, ata 25 anos) e de 5,50 para nenas e nenos.
O pequeno Nemo é o protagonista desta proposta de teatro de marionetas, e vivirá unha serie de soños cargados de humor, perigo, monstros e aventuras, incidindo todos eles nun problema común, o dos residuos e na importancia e necesidade de reciclar para que o lixo non dane o mar, a terra e as estrelas.