Narón é un dos 10 municipios máis poboados de Galicia, con 37.008 habitantes recoñecidos polo Instituto Nacional de Estatística (INE) a data de 1 de xaneiro de 2008. Os veciños/as distribúense entre os seis barrios que compoñen o centro urbano e as sete parroquias da zona rural. Situado na Terra de Trasancos coruñesa, Narón conta cunha extensión de 66,2 Km², e o seu contorno dota a este territorio dunhas características climáticas de tipo oceánico, suaves e con temperaturas pouco extremas.

A localización de Narón no noroeste galego dificultou historicamente o seu acceso desde outros lugares do país. Na actualidade o termo municipal ten conexións coa autoestrada AP-9 e a autovía A-64 Ferrol-Vilalba. A posibilidade de opcións como o tren da costa e a proximidade dos aeroportos da Coruña e Santiago fan do noso Concello un destino ben comunicado.

As fotografías que aquí amosamos son unha chamada para todas as persoas que visiten o noso municipio e que poderán gozar de variadas rutas turísticas que percorren o termo municipal e que descobren fermosos recantos como o Mosteiro de S. Martiño no Couto ou o Muíño de Xuvia

Da súa beleza paisaxística temos que salientar a riqueza das festas e tradicións que durante todo o ano se desenvolven en Narón, e que veñen enriquecidas polo feito de contar cunha historia de seu que medra día a día.