Narón, 10 de Marzo de 2014.- A Concellería de Ensino e Bibliotecas de Narón, dirixida pola edil Mª del Carmen Espada, mantén aberto o prazo de solicitude de inscrición nas Escolas Infantís Municipais de A Solaina, Piñeiros e A Gándara, para o curso 2014-2015. As solicitudes poderanse retirar no Rexistro Xeral do Concello (en horario de 8:30 a 13:30 horas) e nas EIM. Unha vez cubertas, presentaranse -xunto coa documentación requerida- no Rexistro Xeral do Concello ata o vindeiro 31 de marzo. Por outra banda, a Concellería de Acción Social e Participación Cidadá de Narón, dirixida pola edil Catalina García, ven de anunciar a convocatoria de subvencións municipais 2014, por importe conxunto de 30.000 €. O Concello convoca axudas a asociacións e outras entidades de ámbito municipal, nas seguintes áreas: socioeducativa, sociocultural, igualdade, discapacidade, drogodependencia, infancia, inmigración e minorías étnicas, maiores, de prestacións de servizos locais básicos, participación cidadá, mocidade, medioambiental, e saúde. As solicitudes pódense presentar no Rexistro Xeral do Concello ata o 31 de marzo.