Narón, 2 de Marzo de 2015.- O Concelleiro de Promoción Económica de Narón, Pablo Villamar, e a representante da Asociación de Comerciantes de Narón (ACN), Eva Pena, presentaron hoxe en rolda de prensa a charla “Eficiencia enerxética e PAREER” que se desenvolverá no Café Teatro do Pazo da Cultura o xoves 5 de marzo, a partires das 20:00 horas e con entrada de balde. A charla sobre Eficiencia enerxética e PAREER (Programa de Axudas para a Rehabilitación Enerxética de Edificios existentes do Sector Residencial) está aberta a toda a sociedade en xeral, e será impartida por Sergio Ferreiro. Esta conferencia engádese ó ciclo de charlas informativas dirixidas a autónomos, pequenos e medianos empresarios e comerciantes, promovido polo Concello de Narón e a ACN. O ciclo de charlas continuará o xoves 12 de marzo coa conferencia “Estratexias para o incremento das vendas” que impartirá Rocío Infante, asesora de Marketing. A última cita será o xoves 23 de abril coa charla “Planificación Patrimonial: cómo crear e xestionar o teu plan de pensións”, novamente a cargo de Patricia Vilar (avogada) e Manuel Rey (economista).