Narón, 15 de Maio de 2015.- A Concellería de Igualdade de Narón, dirixida pola edil Teresa Sabio, abrirá o luns 18 de maio o prazo de inscrición para participar no programa ConciliaEscola Verán 2015. Os interesados poderán presentar a solicitude no Rexistro Xeral do Concello (en horario de 8:30 a 13:00 horas) ata o día 29 de maio. Os destinatarios deste programa son nenos/as de Narón con idades comprendidas entre os 4 e os 12 anos de idade, tendo prioridade as familias nas seguintes circunstancias: -Empadroados/as no Concello de Narón, e que traballen pai, nai, custodio/a, ou titor/a. -Empadroados/as no Concello de Narón, e que só un dos proxenitores (pai, nai, custodio/a, ou titor/a) traballen. -Empadroados/as no Concello de Narón, sen ocupación do pai/nai/custodio/a ou titor/a. -Non empadroados/as no Concello de Narón, coa mesma orde de preferencia sinalada nos apartados anteriores, en función do traballo. O Concello habilitará un máximo de 105 prazas, divididas en seis quendas: -Do 22 ó 26 de xuño -Do 29 de xuño ó 3 de xullo -Do 6 ó 10 de xullo -Do 13 ó 17 de xullo -Do 20 ó 24 de xullo -Do 27 ó 31 de xullo O programa inclúe transporte e desenvolverase en horario de mañá na área medioambiental do Río Xuvia (Pedroso). Os participantes levarán a cabo as seguintes actividades educativas: Obradoiros de cociña, Aula de natureza, e obradoiros deportivos e de aire libre. Os obxectivos do programa ConciliaEscola Verán son ofrecer servizos para facilitar a conciliación da vida laboral, familiar e persoal, e habilitar recursos para garantir o dereito de acceso á igualdade de oportunidades ás mulleres en risco de exclusión social e dos menores ó seu cargo.