Narón, 27 de novembro de 2015. O Padroado da Cultura aprobou a convocatoria de eleccións para designar a sete representantes da Xunta do Padroado. En total elixirase mediante a pertinente votación a tres representantes das Asociacións de Veciños, outros tres das entidades culturais e un dos Consellos Escolares dos Centros Públicos de Ensino. O prazo de presentación de candidaturas estará aberto ata o vindeiro 11 de decembro –ás 14.00 horas-. As propostas deben formularse por escrito, facendo constar no documento o nome da entidade que presenta a candidatura e tamén o nome, enderezo e número de teléfono dos candidatos, debendo entregarse no Pazo da Cultura, no horario de apertura habitual das instalacións. As votacións para elixir aos citados representantes terán lugar o vindeiro 16 de decembro no Pazo da Cultura. Ás 18.00 horas serán as correspondentes á elección dos membros dos Consellos Escolares, ás 18.30 dos das asociación de veciños e ás 19.00 dos de entidades culturais. As votacións serán secretas e en lista aberta, tendo que escoller cada entidade a un número de candidatos non superior ao que lle corresponde ao seu grupo na Xunta, tal e como se explicou desde o Padroado da Cultura. O período de vixencia dos cargos será de dous anos.