Narón, 24 de xaneiro de 2016. O salón de actos do Centro Cívico municipal do Alto do Castiñeiro acolleu a pasada semana unha nova sesión de traballo, a cuarta, do Consello Sectorial de Igualdade (en constitución). As edís de Participación Cidadá e Igualdade, Catalina García e Teresa Sabio, respectivamente, mantiveron un encontro con representantes de dez entidades para avanzar nas actividades conmemorativas que se desenvolverán o vindeiro mes de marzo e tamén para continuar traballando no expediente de constitución do citado Consello. Sumáronse á convocatoria integrantes das AVV Os Irmandiños do Val e Virxe de Fátima, de Freixeiro; do Patronato Concepción Arenal; de Acadar; Cogami; da Asociación de Comercio de Narón; a ASCM; a Asociación de Mulleres Rurais San Clemente; a Fundación Terra de Trasancos, do Val, e Bbtta, ademáis dunha integrante da Escola de Participación Cidadá. Tras repasar o traballo realizado en sesións anteriores, a edil de Igualdade explicou as actividades que desde o Concello se prevén programar o vindeiro mes de marzo e indicou que esa programación, unha vez concretados espazos e horarios, se remitirá ás entidades desde a Escola de Participación Cidadá. Así mesmo, Teresa Sabio animou á representación das entidades alí presentes a enviar as súas propostas, “co fin de coordinar datas e proceder a difundilas entre a veciñanza de cara á súa posible participación nas mesmas”. Pola súa banda, a edil de Participación Cidadá referiuse ao procedemento para constituír formalmente o Consello Sectorial de Igualdade e recordou a importancia de que cada entidade notifique ao Concello por escrito –a través do Rexistro- un titular e un suplente para formar parte do mesmo e traballar xunto cos representantes dos grupos políticos municipais. Así mesmo, Catalina García aludiu á necesidade de actualizar o Rexistro Municipal de Entidades, solicitando a entrega da documentación pertinente e comunicando, no caso de que se realizasen, as modificacións na xunta directiva. “Trátase dunha cuestión a ter moi en conta polas asociacións porque se os datos non están ao día procederase a dalas de baixa do citado rexistro, co que perderán todos os dereitos contemplados á hora de concesión de subvencións e convenios, uso de equipamentos e outras posibles axudas”, subliñou García. As edís de Participación Cidadá e Igualdade agradeceron a colaboración das diferentes entidades e recordáronlles que o vindeiro 18 de febreiro se prevé celebrar unha nova xuntanza no Centro Cívico do Alto para continuar avanzando na programación a desenvolver desde o Concello e coas diferentes asociacións no municipio.