Narón, 21 de febreiro de 2019. O Concello implantará a partir do luns 25 de febreiro o estacionamento como zona azul desde o inicio da rúa 25 de Xullo ata a rúa Murillo, nas inmediacións da Casa Consistorial, o centro de saúde e a Biblioteca municipal. Así o anunciou o concelleiro de Seguridade Cidadá e Transporte Público, Guillermo Sánchez Fojo, que explicou que estes días se está informando á cidadanía sobre este cambio –xa delimitado con sinalización horizontal e vertical- e que a partir do luns procederase a controlar o cumprimento da nova normativa de estacionamento nesta zona. De luns a venres, entre as 8.00 e as 15.00 horas estableceuse un tempo máximo de estacionamento dunha hora. Os condutores, no momento de aparcar na zona azul, deben deixar obrigatoriamente nun lugar visible do vehículo –na parte de mando- un documento ou un disco de control no que se especifique a hora de chegada, de xeito que se poida comprobar que non se sobrepasa, a partir do luns, o tempo fixado dunha hora para poder deixar o vehículo na zona. “En total habilitaranse nese tramo vinte e cinco prazas de estacionamento rotativo como zona azul, unha medida que permitirá que máis persoas poidan acceder a estas prazas ao estar un tempo máximo dunha hora”, asegurou Sánchez Fojo. O edil explicou que “a mobilidade será constante durante esas sete horas de luns a venres, polas mañás, e iso facilitará o feito de atopar un espazo para aparcar, aínda que sexa por tempo limitado”.