Narón, 28 de febreiro de 2020. O Concello de Narón solicita á cidadanía que extreme as precaucións tras recibir un aviso emitido por Aemet dunha alerta laranxa por vento que se iniciará esta noite ás 21.00 horas e finalizará ás 9.30 horas de mañá sábado. Así o anunciou o concelleiro de Seguridade Cidadá, Román Romero, que recordou as recomendacións para este tipo de situacións. O edil indicou que ante esta alerta laranxa, con refachos que nalgunhas zonas poderán alcanzar os 100 quilómetros por hora, recoméndase á cidadanía evitar as actividades no exterior –parques, xardíns…-, e na medida do posible tamén os desprazamentos e o uso de vehículos lixeiros, como bicicletas e ciclomotores. A maiores, é preciso afastarse de zonas con árbores, paneis publicitarios ou outros obxectos susceptibles de desprazarse co vento e retirar das fiestras, balcóns e tellados obxectos que poidan caer á rúa.