Narón, 22 de xuño de 2020. Unha das unidades móbiles da Axencia de Doazón de Órganos e Sangue (ADOS) do Servizo Galego de Saúde desprazarase esta fin de semana á cidade. Na xornada do vindeiro venres, día 26, a unidade permanecerá estacionada nas inmediacións do centro de saúde do Alto, entre as 15.30 e as 21.00 horas, e o sábado día 27 estará nas inmediacións da Praza da Constitución, na Solaina, entre as 10.00 e as 15.00 horas. Con motivo de incrementar a seguridade tanto do persoal da unidade como das persoas que acudan a doar sangue a estas unidades, debido á crise da Covid-19 recoméndase solicitar cita previa para realizar a doazón, chamando ao número de teléfono 900 100 828. Dende ADOS inciden ademais en que en cada procedemento se seguen uns exhaustivos protocolos de seguridade, como medida preventiva. Así mesmo, recalcan a importancia de cumprir todas as indicacións do persoal sanitario e de gardar, como mínimo, unha separación dun metro de distancia nas zonas de espera habilitadas para realizar as doazóns.