Narón, 15 de xullo de 2020. O Concello habilitou un Plan Especial de Tráfico con motivo da celebración o vindeiro sábado, día 18, dunha nova edición da “Noite no mosteiro”. O cenobio de San Martiño de Xuvia, no Couto, iluminarase no exterior de xeito artístico e con varias cores e acollerá -tamén no exterior- un concerto de música clásica (con violín e chelo) do grupo “The Duelist”. Haberá tres pases do concerto entre as 22.30 e as 01.00 horas e o acceso á zona permitirase a partir das 22.00 horas. O concelleiro de Seguridade Cidadá, Román Romero, avanzou que para reorganizar o tráfico na zona se estableceu un Plan de Tráfico, ampliando as zonas de estacionamento e restrinxindo a circulación rodada nas inmediacións do cenobio naronés. O edil explicou que a maiores da zona de estacionamento habilitada na zona verde ubicada fronte ao mosteiro tamén se fará uso, no caso de ser preciso, da localizada xunto ao local social da Picota, no Couto, e a maiores disporanse prazas de estacionamento en liña na rúa Soria e no Camiño do Cenzo, tamén nas inmediacións do cenobio e que pasarán a ter sentido único de circulación, de baixada, mentres se desenvolva este evento. No que respecta á circulación rodada, o sentido de circulación será dobre no Camiño do Muíño, mentras que terá sentido único na Rúa Soria e no Camiño do Cenzo, debidamente indicado e con persoal da agrupación de voluntarios de Protección Civil que orientará aos condutores que circulen pola zona. “Poderase só circular dende a avenida Souto Vizoso ata o cenobio e a subida realizarase dende o local social cara á avenida Souto Vizoso”, explicou Romero.