Narón, 21 de maio de 2021. A alcaldesa da cidade, Marián Ferreiro, desprazouse esta semana á 41ª edición da Feira Internacional de Turismo (Fitur), en Madrid, xunto con outros rexedores locais dos concellos que integran a Mancomunidade para promocionar o xeodestino Ferrolterra-Rías Altas. Ferreiro incidiu na importancia desta convocatoria “como elemento dinamizador do sector turístico e de recuperación económica desta actividade, tamén moi afectada no último ano pola situación sanitaria”. Así mesmo, destacou que este evento representa “todo un escaparate para poder amosar a riqueza natural, patrimonial e cultural, e en definitiva todo o potencial que ofrecen os concellos da comarca”. O xeodestino Ferrolterra-Rías Altas apostou por dar a coñecer a ampla oferta turística en zonas nas que poder estar en contacto directo coa natureza, destacando o Camiño a San Andrés de Teixido –cun vídeo promocinal que se puido ver en Fitur- e o Inglés cara a Compostela, en ambos casos cunha parte do trazado que discurre polo municipio naronés e outros da comarca, os acantilados, as praias... A alcaldesa de Narón destacou “a importancia de que todos os concellos da Mancomunidade esteamos traballando conxuntamente para potenciar o sector turístico e dar a coñecer todos os recursos dispoñibles e tamén a oferta de ocio para un turismo de carácter familiar e que aposta por zonas menos masificadas”.