Narón, 25 de novembro de 2021. A praza da Gándara acolleu esta mañá, ás 11.30 horas, o acto institucional organizado polo Concello con motivo do 25 de novembro, Día Internacional contra a violencia de xénero. A alcaldesa, Marián Ferreiro, presidiu a convocatoria, á que asistiron outros edís da corporación local, entre eles a concelleira de Igualdade, Mar Gómez. Acudiron tamén representantes do movemento asociativo e entidades da cidade e docentes e alumnado de quinto de Primaria do colexio Santiago Apóstol, que levaron as súas pancartas do 25 de novembro. A xornada comezou coa inauguración da Praza da Igualdade, ubicada fronte á da Gándara e da que a rexedora local descubriu esta mañá a placa que lle dá nome, incidindo na importancia de “acadar esa tan necesaria igualdade real entre homes e mulleres”. Tralo acto Ferreiro desprazouse co resto dos asistentes á zona na que se está ultimando o mural gañador do certame “Concurso de imaxes pola igualdade para escolares: violencia machista e as redes sociais”. O traballo realizado por Marcos Díaz, Raúl Díaz, Manuela López, Estela Gulias, Yaiza Amenedo e Elías Fontao, alumnas e alumnos de terceiro A do IES Terra de Trasancos, pode verse nas inmediacións da Praza da Igualdade. A continuación, na Praza da Gándara, donde chegou o alumnado do CPR Santiago Apóstol, a alcaldesa leu o manifesto da Federación Galega de Municipios e Provincias #PoloBoTrato, no que se incide no agravamento do problema da violencia de xénero coa covid-19 e tamén se recoñecen avances na loita contra esta lacra e se alude ao traballo que queda por facer. Dende a Fegamp lembrouse ás vítimas “que os concellos están aí para axudalas a saír desa situación” e no documento tamén se reitera o firme compromiso das entidades locais de combater “tan inxusta, irracional e gran eiva”. Trala lectura, Ferreiro deu paso a dous alumnos do colexio Santiago Apóstol que leron tamén un poema reivindicativo da igualdade e contra a violencia de xénero. En canto aos centros de ensino da cidade, o alumnado participou tamén nunha marcha ciclista virtual, tras suspenderse a prevista de xeito presencial polas previsións meteorolóxicas. O alumnado pedaleou nas aulas, realizando un percorrido virtual que ían vendo nun vídeo que partía dos centros e remataba no Monumento á Muller, na Praza da Gándara. Finalmente os asistentes ao acto puideron ver na Praza da Gándara a exposición itinerante do 25N. En relación ao programa, na Biblioteca municipal pódese ver tamén ata o 27 deste mes a exposición bibliográfica “Na loita contra as violencias”. A maiores, esta tarde, a partir das 18.30 horas, iluminarase de cor malva a fachada do Pazo e a rotonda de Freixeiro, coa finalidade de visibilizar esta data. A Biblioteca acollerá mañá un novo acto, ás 19.30 horas, que consistirá nunha sesión de contos para público adulto –a partir de 16 anos-. “Seica” é o título desta proposta para a que é preciso inscribirse previamente na propia Biblioteca ou chamando ao teléfono 981 382 173. As actividades conmemorativas do 25N chegaron tamén á ludoteca municipal, donde se realizan esta semana un mural, obradoiros e xogos pola igualdade. Marián Ferreiro agradeceu a implicación e participación no acto das entidades sociais e dos centros de ensino, destacando o “importante papel que xogan tamén nese camiño que temos que seguir percorrendo entre todas e todos para erradicar esta lacra social”.