Narón, 14 de Marzo de 2013.- A representación teatral da obra ‘Malos hábitos’, prevista inicialmente para o venres 15 de marzo, trasládase ó día 12 de abril, por motivos de forza maior. A enfermidade dunha das actrices protagonista (Camila Bossa) fixo necesario este cambio de data. Mantense o mesmo lugar e a mesma hora fixada inicialmente, é dicir, no Auditorio Municipal da Praza de Galicia, ás 20:00 horas. A entrada a este espectáculo é de balde. Pódense retirar nas taquillas do Auditorio, 30 minutos antes do comezo da función. ‘Malos hábitos’ está protagonizada por Camila Bossa e Iolanda Muíños. Esta última foi elixida recentemente Muller do Ano en Narón 2013, por ter destacado profesionalmente e polos valores que representa para o resto das mulleres. Ambas actrices optan ó premio de teatro María Casares 2013 na categoría de mellores actrices protagonistas. Esta obra de teatro forma parte da programación de actividades da Concellería de Igualdade de Narón, dirixida pola edil Teresa Sabio, para conmemorar o 8 de marzo, Día Internacional da Muller.