Narón, 7 de Abril de 2014.- A Concellería de Xestión Orzamentaria e Promoción Económica de Narón, dirixida polo edil Pablo Villamar, en colaboración coa Asociación de Comerciantes de Narón (ACN), levará a cabo o vindeiro 10 de abril a terceira charla do ‘Plan de Formación a Autónomos, PEMES e Pequeno Comercio de Narón 2014’, coa que rematará este programa iniciado no mes de febreiro. A cita é no Café Teatro do Pazo da Cultura de Narón, a partires das 20:45 horas. A entrada é de balde, e están dirixida a comerciantes, autónomos e pequenos empresarios do municipio. A charla leva por título “A factura eléctrica: Qué pagamos? Posíbeis alternativas para pagar menos”, e será presentada por Olga Ameneiro, presidenta da ACN. Os encargados de impartila serán Xosé Manuel Golpe, técnico da FAEPAC (Fundación Axencia Enerxética Provincial de A Coruña) e Pablo Villamar (Concelleiro de Promoción Económica). Segundo explicou o edil de Promoción Económica e Xestión Orzamentaria, o Concello de Narón iniciou en febreiro estas charlas coa previsión de prolongalas o resto do ano. Pablo Villamar fixo un chamamento público ós profesionais ós que van dirixidas para a súa participación. Ademáis das conferencias propiamente ditas, inclúense unha rolda de preguntas que poden facer os interesados en relación coa temática de cada charla. Con anterioridade, celebráronse dúas charlas sobre “Ultimas novidades nas normativas relativas á Seguridade Social e Facenda. Especial referencia ao IVE de caixa” e “Principios de xestión para a pequena e mediana empresa”.