Narón, 27 de Xuño de 2014.- O Paseo Marítimo de Xuvia celebrará a 11ª edición da Festa de Exaltación do Marisco da Ría “Alteada 2014”, que foi presentada hoxe en rolda de prensa pola Concelleira de Festas e Ocio, Mª del Mar Gómez, e o presidente da AVV ‘Altea’ de Xuvia, Ramón Silveiro. A cita terá lugar o domingo 13 de xullo ás 14:00 horas, nunha carpa situada no Paseo Marítimo de Xuvia onde se servirá un menú composto por: Sopa de marisco, Ameixas á mariñeira (da Cofradía de Barallobre), Merluza á cazuela, postre, café e chupito. O xantar estará amenizado polo cantante Jorge Latino. As entradas teñen un prezo de 20 € e xa están á venda no local social da AVV Altea de Xuvia, en horario de 9:00 a 13:00 horas e de 16:00 a 20:00 horas. Tamén se poden reservar chamando ó teléfono 981 39 35 61. Este evento está organizado pola AVV Altea de Xuvia, e conta coa colaboración do Concello de Narón. O presidente da entidade veciñal agradeceu ó goberno municipal “a atención que nos prestan sempre á hora de organizar esta festa” e recordou a importancia da entrada en servizo da depuradora posto que “a ría saneada sería unha grande empresa que podería dar traballo a moitas familias da comarca”, indicou Silverio. Cabe lembrar que a Alteada naceu coma unha festa para reivindicar o saneamento da ría “e por fin estase vendo a luz ó final do túnel” concluíu o presidente da entidade. A Concelleira de Festas, Mª del Mar Gómez, animou ós veciños e veciñas de Narón “ a participar nesta festa gastronómica, e disfrutar do entorno privilexiado do paseo marítimo de Xuvia” concluíu, non sen antes destacar o excelente traballo que leva a cabo esta entidade veciñal á hora de organizar a Alteada.