Narón, 15 de Abril de 2015.- A Concellería de Ensino e Bibliotecas de Narón, dirixida pola edil Mª del Carmen Espada, ven de ultimar o programa de actividades da Biblioteca Municipal do Alto, deseñadas para conmemorar o Día do Libro (23 de abril). Dentro desta programación inclúense unha Feira-Mostra do libro usado e de segunda man e diferentes obradoiros, para cuxa participación será precisa a inscrición previa. A feira desenvolverase todas as tardes entre o luns 20 e o venres 24 de abril, en horario de 17:00 a 20:00 horas. As actividades dentro desa mesma semana complétanse cun Obradoiro de Scrapbooking para adultos/as (mércores 22 de 17:30 a 20:30 horas), un Obradoiro Infantil de manualidades con libros reciclados (xoves 23 de abril de 18:00 a 19:30 horas) e un Obradoiro infantil creativo ‘Fotoconto’, no que os nenos/as participantes realizarán o seu propio conto e o ilustrarán coas súas propias imaxes. O resultado será un libro feito por eles mesmos que se colgará na web da Biblioteca e se imprimirá para a súa consulta en sala. Para participar nas actividades do programa Biblioespazo 2015 é preciso ter o carné da Biblioteca e reservar praza previamente. As listas para as reservas ábrense sempre uns días antes da celebración das actividades, e nalgúns casos complétanse no mesmo día.