Narón, 30 de novembro de 2015. Dezaoito carros de compra por valor de 100 euros cada un, catro cestas de Nadal de 125 euros, dous vales de compra de 500 euros e outros tantos de 300 euros son os premios que repartirá a campaña de Nadal que organiza a Asociación de Comerciantes de Narón en colaboración coa Concellería de Promoción Económica que dirixe Pablo Villamar. O edil e Mónica Cereijo, representante da entidade, presentaron co responsable de Eventi, Víctor Caneiro, unha iniciativa que nesta ocasión se estenderá desde o 7 de decembro ata o 14 de xaneiro e na que xa están inscritos 124 establecementos comerciais do concello. Villamar destacou o interese común da Asociación de Comerciantes de Narón e da Concellería de Promoción Económica en “potenciar o comercio de proximidade, que se caracteriza por ofrecer un bo servizo e produtos e servizos de calidade”. Nesa liña, subliñou que o obxectivo desta campaña, ademais de contribuír a dinamizar o pequeño comercio, céntrase en premiar a fidelidade da clientela, como proba o feito de que a contía dos premios se achegue aos 4.000 euros en total. Ademais dos premios, o concelleiro de Promoción Económica anunciou que haberá tamén actividades paralelas, ás que se sumarán as que organicen outras áreas municipais como a de Turismo e a de Festas. Así, os días 19 e 20 de decembro terá lugar unha concentración de Food Trucks na Praza de Galicia. Tamén haberá dous concertos instrumentais de panxoliñas a cargo do dúo Son do Ar. Serán os días 19 de decembro, a partires das 12.00 horas na Praza de Galicia, e o 25, neste caso a partires das 11.00 horas na praza do antigo Concello, en Xuvia. Os máis pequenos serán tamén protagonistas coa visita dos populares personaxes televisivos Minions, que estarán o día 12 de decembro de 12.00 a 14.00 horas na Praza da Gándara; o día 20 no mesmo horario na Praza de Galicia, e o día 25, de 11.00 a 13.00 horas, na Praza do Concello de Xuvia. As persoas e os establecementos comerciais interesados poden obter máis información a respecto do calendario de actividades e dos sorteos e entrega dos diferentes premios na páxina web: www.comerciodenaron.es.