Narón, 7 de xuño de 2017. O local social do Alto do Castiñeiro acollerá este sábado, día 10, a cuarta edición da “Liga Impact Modern 2017” do xogo de cartas Magic The Gathering. A cita, que dará comezo ás 10.30 horas, ten como novidade que se retransmitirá en “streaming” a través da canle de Twitch (Impactreturns). A organización, a cargo da Asociación Cultural Impact Returns e na que colabora o Concello de Narón, conta con reunir a medio cento de participantes nesta convocatoria, procedentes de diferentes municipios de Galicia e Asturias. No torneo do vindeiro sábado poderase obter unha ronda gañada para o Impact Returns Modern que se organizará para o Impact Weekend Narón, os días 21, 22 e 23 de xullo, donde se disputarán torneos de Legacy, Modern e Old School. Os participantes terán ademais a oportunidade de loitar por unha das cinco prazas existentes coas que conta a citada asociación para a Final rexional galega –que se celebrará en decembro- de Modern. De xeito paralelo organízanse en horario de tarde partidas para os xogadores eliminados do torneo principal ou os que só poidan acudir pola tarde, donde terán a oportunidade de divertirse e tamén de gañar premios.