Narón, 13 de abril de 2018. A compañía Elefante Elegante estará este domingo, día 15, no Pazo da Cultura, para representar o espectáculo Patapatúm. A posta en escena desta obra marcará o inicio da trixésimo sexta edición da “Mostra de Teatro Infantil e Xuvenil” organizada polo Padroado da Cultura de Narón, e na que se enmarcan outras representacións e actividades cuxo programa se dará a coñecer proximamente, tal e como indicou a concelleira de Cultura, María del Carmen Espada. Esta cita co teatro xestual na cidade, dirixida a público familiar e infantil (nenas e nenos de 2 a 8 anos) dará comezo ás 18.00 horas e terá unha duración aproximada dunha hora. As entradas están á venda na billeteira do Pazo, a un prezo de 9,50 euros para público xeral; de 6,65 para abonados, desempregados e persoas con carné xove ou de estudante (ata 25 anos) e de 5,50 para menores de 14 anos. María Torres e Gonçalo Guerreiro dirixen este espectáculo, á vez que conforman, xunto con Agustín Bolaños, o elenco do mesmo. A compoñente plástica e musical forman parte desta divertida obra, na que se trata de facer reflexionar aos espectadores sobre a presenza dos bens materiais nas relacións entre pais e fillos. Os casos nos que con moreas de agasallos algúns pais e nais tentan en ocasións acadar a felicidade dos seus fillos e fillas e, en ocasións, suplir a falta de tempo que os proxenitores lles adican, é un dos temas que se abordarán neste espectáculo.