Narón, 24 de outubro de 2018. O Concello ultima os traballos da reforma do xardín da Biblioteca municipal e instalación de rego automatizado, un proxecto que suporá ás arcas locais un desembolso de 13.368 euros. O edil de Servizos, Ibán Santalla, explicou que a actuación que se executa desde hai uns días nas inmediacións destas instalacións permitirá mellorar considerablemente toda a zona verde que rodea ao edificio. “Estase instalando un sistema de rego automatizado para conservar mellor o céspede que bordea a Biblioteca municipal, que non tiña en determinadas épocas do ano os niveis óptimos de humidade e secaba a tempadas chegando incluso a desaparecer”, explicou Santalla. Así mesmo, o edil avanzou que nun área duns 95 metros de perímetro plantáronse setos, concretamente na confluencia do perímetro do edificio coa zona verde. Así mesmo, Santalla indicou que tanto no acceso á sala de adultos como á zona infantil da Biblioteca se plantarán unhas especies ornamentais e asegurou que os traballos estarán rematados antes de finais deste mes. “Barrio a barrio continuamos avanzando na mellora das zonas verdes do noso concello, e tamén nas parroquias do rural, para conservalas no mellor estado posible”, apuntou o edil, que incidiu en que “nesa mesma liña é na que continuaremos traballando desde o grupo de goberno, para que Narón continúe sendo esa cidade na que querer vivir e cunha ampla oferta en servizos e infraestruturas para as nosas veciñas e veciños”.