Narón, 29 de outubro de 2018. O Concello de Narón licita en 64.999 euros o servizo de iluminación exterior ornamental das rúas e prazas do termo municipal durante as festas do Nadal. O edil responsable da área, Ibán Santalla, indicou que o servizo deberá estar operativo desde o 7 de decembro ata o 7 de xaneiro do vindeiro ano. As ofertas, tal e como apuntou o concelleiro de Servizos, poden presentarse ata o 12 de novembro, ás 23.59 horas, a través da Sede Electrónica do Concello, se ben se poderán enviar por correo postal ou entregar na Alcaldía –segundo andar do Concello- de luns a venres, en horario de 8.30 a 13.30. No termo municipal –zonas urbana e rural- instalaranse preto de duascentas arcadas luminosas nas estradas e avenidas principais –a maior cantidade, 71, na estrada de Castela-, e tamén nas farolas no caso do núcleo urbán. Así mesmo, haberá varios motivos navideños en 3D ou árbores nas rotondas e prazas -23 de Novembro, da Constitución, antigo Concello de Xuvia, Álvaro Paradela, Gándara-, contemplándose un ano máis a ornamentación do abeto do xardín da residencia San José de Piñeiros, donde tradicionalmente ten lugar o acto oficial do acendido de Nadal. Unha das propostas recollidas no plego é a colocación dun elemento de iluminación visitable no seu interior, simulando unha gran bola de adorno de Nadal, de catro metros de altura por catro de ancho. A Casa do Concello iluminarase tamén no exterior con motivos navideños, así como a rotonda da estrada de Castela, na zona do Ponto (Piñeiros). Nas parroquias do rural colocaranse varias arcadas en diferentes ubicacións, tal e como se especifica no plego, que deberán ser un mínimo de corenta. No plego deste contrato –que se pode consultar na páxina web do Concello e a través da Plataforma de Contratación do Sector Público, especifícase que o alumeado de Nadal debe acenderse ás 18.00 horas, todos os días, e apagarse de madrugada, ás 01.00 horas excepto os días 24, 25 e 31 de decembro e 1, 5 e 6 de xaneiro. “O alumeado navideño, cos diferentes motivos e elementos a instalar na cidade, contribuirá a ambientar estas datas”, apuntou Santalla, que amosou a súa confianza en que “o traballo que se realice sexa do agrado das nosas veciñas e veciños”.