O Concello de Narón pon de novo en marcha as rutas ciclistas para os nenos dos colexios do municipio, que combinan dun xeito lúdico deporte, educación vial e historia. A Policía Local organiza o programa de saídas, coordina as actividades e imparte os coñecementos básicos de educación vial; tanto a nivel teórico con exposicións nos colexios, como a nivel práctico coas rutas en bicicleta marcadas. A técnico auxiliar do arquivo, Anabel Bello Platas, súmase este ano tamén á iniciativa para aportarlle un matiz histórico, con charlas adaptadas a idade dos rapaces sobre a historia do municipio e das zonas visitadas. O programa de actividades comezou esta mañá coa visita de medio centenar de alumnos de A Solaina ó castro de Eiravedra. Os nenos desprazáronse en tren ata Sedes, e, unha vez alí, subiron ata o castro en bicicleta, onde viviron unha introdución ó mundo castrexo, a súa historia, e a forma de vida dos habitantes dos castros. Tamén tiveron acceso a mostras de cerámica, torques, e a unha reprodución do plato de Eiravedra, propiedade do Concello. Os escolares recibiron un bocadillo e un refresco antes da súa volta ó colexio. A compañía Coca-Cola colabora coa iniciativa neste senso. A Policía Local levará esta iniciativa a dez colexios de Narón, en actividades que se desenrolarán ata o día 10 de decembro. A seguinte cita será hoxe. Visitarán o colexio Ayala ás 9:00 horas, para dar unha charla ós nenos de 1º e 2º curso, e farán unha saída a Xuvia as 15:30 horas cos rapaces do colexio Santiago Apóstol de 5º e 6º ano.