Narón, 5 de febreiro de 2019. A actriz Lolita Flores subirase o vindeiro venres, día 8, ao escenario do Pazo para representar a obra Fedra, da compañía Pentación. Estará acompañada polos tamén actores Juan Fernandez, Críspulo Cabezas, Eneko Sagardoy e Tina Sainz, que xunto con Lolita Flores representarán unha peza tráxica protagonizada por Fedra, unha raíña enferma interpretada por Lolita e da que os médicos descoñecen a orixe da súa doenza. A representación comezará ás 20.30 horas. Fedra é unha peza teatral que reflicte un amor non correspondido, o que a protagonista sinte polo seu fillastro a través dun desexo que trata de resistir. As acusacións e a morte estarán moi presentes nesta historia dun amor prisioneiro e indecente. As entradas aínda dispoñibles para ver Fedra poden adquirirse na billeteira do Pazo ou na web do Padroado da Cultura –www.padroadodecultura.es- a un prezo de 20 euros para o público xeral e de 14 para abonados, desempregados e persoas con carné xove ou de estudante (ata 25 anos). Na xornada do domingo, día 10, continuará ás 18.00 horas a programación cultural no Pazo, nesta ocasión cun concerto de música folk a cargo do grupo Trotaventos dirixido ao público familiar e infantil. A fiestra dos soños é o título do primeiro traballo desta nova banda musical, que protagonizará un espectáculo para soñadores baseándose nunha serie de historias independentes nas que a poesía se convirte en cancións cunha gran variedade de influencias e ritmos, compases e tonalidades, sen perder en ningún momento de vista a música popular. As entradas para o concerto de Trotaventos teñen un prezo de 9,50 euros para o público xeral; de 6,65 para abonados, desempregados e persoas con carné xove ou de estudante e de 5,50 para menores de 14 anos.