Narón, 24 de xuño de 2019. O goberno local respalda a nova acción que, impulsada a través da Federación Comarcal de Anpas de centros públicos de Ferrolterra, se levará a cabo mañá co fin de esixir a reapertura da escola de Pedroso para o vindeiro curso: 2019/2020. O colectivo e as familias presentarán mañá –ás 12.00 horas no edificio administrativo da Xunta en Ferrol- recursos administrativos contra a resolución da Comisión de Escolarización de Narón, para instar á Xunta a concederlles a primeira opción de matrícula aos nenos e nenas que solicitaron en primeiro lugar a escola de Pedroso do CRA de Narón, tras concederlles recentemente a segunda opción. As persoas afectadas recordan que cumpren con todos os requisitos esixidos pola administración autonómica para que o centro continúe aberto, ao dispoñer de suficientes matrículas para o curso que se iniciará en setembro e tamén de cara ao curso 2020/2021, tal e como manifestaron á propia Xunta de Galicia. Dende a Federación de Anpas de centros públicos de Ferrolterra convidan ás familias da cidade e do resto de concellos da comarca a apoiar esta nova reclamación, concentrándose mañá ás 12.00 horas fronte ao edificio administrativo da Xunta, en Ferrol. Dende o goberno local de Narón, que en reiteradas ocasións urxiu á Xunta –sen obter resposta algunha- que confirmase a reapertura deste centro ás familias, sumaranse novamente a este acto reivindicativo convocado co fin de esixir a reapertura da escola de Pedroso para o curso 2019/2020, entendendo e respaldando as xustas reivindicacións das familias afectadas polo peche deste centro de ensino na cidade.