Concello de Narón
  • Concello de Narón
  • El tiempo en Narón
  • Entrada a Naronmail
Noticias
MÁIS DE 7.500 ESCOLARES DE CENTROS DE ENSINO DE NARÓN E COMARCA ASISTIRÁN ÁS FUNCIÓNS DA "XXXV MOSTRA DE TEATRO INFANTIL E XUVENIL"
A alcaldesa da cidade e presidenta do Padroado da Cultura, Marián Ferreiro, anunciou que a Mostra comenzará o vindeiro 16 de outubro no Pazo da Cultura
Narón, 12 de outubro de 2019. A trintena de funcións da trixésimo quinta edición da “Mostra de Teatro Infantil e Xuvenil” do Padroado da Cultura darán comezo o vindeiro mércores, día 16. A alcaldesa da cidade e presidenta do Padroado, Marián Ferreiro, indicou que algo máis de 7.500 escolares de centros de Narón e comarca asistirán ás representacións teatrais que se desenvolverán entre este mes e decembro no Pazo da Cultura, no Auditorio municipal, nas tres escolas infantís municipais e na unidade de Preescolar do colexio Santiago Apóstol. A Deputación da Coruña e a Axencia Galega das Industrias Culturais colaboran nesta Mostra na que actuarán cinco compañías. “Trátase dunha proposta coa que un ano máis achegamos a cultura, neste caso a través do teatro, ás alumnas e alumnos de centros de ensino da nosa cidade e tamén doutros municipios, apostando tamén firmemente polo traballo que en materia de artes escénicas se está realizando en Galicia, representado nesta ocasión por cinco compañías”, asegurou Ferreiro. A compañía Piedras de cartón será a encargada de inaugurar esta nova edición da Mostra de Teatro Infantil e Xuvenil, representando os días 16, 17 e 18 deste mes –ás 10.00 e ás 12.00 horas- a obra “Lázaro de Tormes” no Pazo da Cultura. Alumnado de quinto e sexto de Primaria e de primeiro e segundo curso de ESO é o destinatario destas funcións, que terán lugar en horario de mañá. O día 16 acudirán escolares dos colexios da Solaina, IES Terra de Trasancos, Santiago Apóstol, O Feal e Jorge Juan, de Narón e tamén do Ramo e A Xunqueira, de Fene; do Eladia Mariño, de Pontedeume, e do Santiago Apóstol, de Franza. Os días 22, 23 e 24 de outubro será o turno da compañía Elefante Elegante, que representará a obra “Patapatúm”, tamén no Pazo da Cultura, para alumnado de primeiro a cuarto curso de Primaria e nestas mesmas instalacións municipais representarase “Os fillos do sol”, a cargo da compañía Contraproducións os días 29 e 30 deste mes para alumnas e alumnos de terceiro e cuarto curso de ESO e de primeiro e segundo de Bacharelato. A XXXV Mostra de Teatro Infantil e Xuvenil continuará no mes de novembro no Auditorio municipal, donde os días 5, 6 e 7 actuará a compañía Ghazafelhos, que representará “Acuario”. Acudirán un total de 1.773 alumnas e alumnos de educación Infantil de colexios de Narón e comarca. No mes de decembro a Mostra de Teatro Infantil e Xuvenil do Padroado da Cultura de Narón chegará ás tres escolas infantís municipais –A Solaina, A Gándara e Piñeiros-, os días 10, 11 e 12, con dúas representacións en cada unha delas –ás 10.00 e ás 12.00 horas- a cargo da compañía Caramuxo Teatro, que representará a obra “Redondo”. O mesmo espectáculo poderao ver o día 13 de decembro o alumnado da unidade de Infantil do colexio Santiago Apóstol de Narón. Os escolares pagan dous euros en concepto da entrada para ver estes espectáculos da Mostra, se ben o Concello de Narón corre cos gastos de desprazamento dos nenos e nenas matriculados en centros educativos da cidade. No caso das escolas infantís municipais da Gándara, A Solaina e Piñeiros e da unidade de Preescolar do Santiago Apóstol de Narón as representacións serán nos propios centros. Acudirán entre outubro e decembro escolares dos centros públicos e concertados de Narón e tamén doutros dos concellos de Ferrol, Fene, Neda, Ares, Mugardos e Pontedeume. Marián Ferreiro destacou a importancia de “achegar as artes escénicas aos nenos e nenas, a través de iniciativas como esta Mostra teatral do Padroado da Cultura”. Así mesmo, a alcaldesa incidiu en que “ao mesmo tempo, contribuímos a difundir o excelente traballo que cinco compañías galegas están realizando no mundo do teatro, con espectáculos dirixidos neste caso a escolares de diferentes idades”.

<<< Marzo 2024 >>>

LMMXVSD
 
1
2
3
4
5
6
7
8
9
10
11
12
13
14
15
16
17
18
19
20
21 22
23
24
25
26
27
28
29
30
31
Eventos do Concello
naron.gal