Narón, 21 de decembro de 2019. O primeiro tenente de alcalde de Narón, Guillermo Sánchez Fojo, o edil de Xestión Orzamentaria e portavoz de TEGA, Román Romero, e o edil de Promoción Económica e portavoz do PSOE, David Pita, mantiveron onte unha xuntanza co director do Instituto Galego de Promoción Económica (Igape), Juan Cividanes, para interesarse polas xestións realizadas pola Xunta sobre a empresa Poligal. A xuntanza solicitouna a alcaldesa da cidade, Marián Ferreiro, que por motivos de axenda non puido acudir onte á convocatoria. Sánchez Fojo explicou que Cividanes lles explicou que trala paralización por parte do xuíz do concurso de acreedores, é preciso esperar ao ditame e fallo xudiciais para que o Igape poida realizar algunha xestión respecto á empresa. A maiores, o representante do citado organismo autonómico asegurou que dos 113 traballadores da empresa un total de 49 están actualmente empregados, dez están asistindo a cursos de formación e dos restantes non lles consta a súa actual situación laboral ou formativa. Finalmente os representantes do goberno local naronés trasladaron a Cividanes que o Concello continuará pendente de todos os trámites que se realicen respecto ao futuro das persoas que formaban o plantel da compañía e reiteraron o ofrecemento da súa colaboración na procura de solucións tralo peche da empresa.