Narón, 4 de marzo de 2020. Axentes da Policía Local de Narón intensificarán os controis que habitualmente se realizan no termo municipal para erradicar a proliferación de vertedoiros incontrolados, localizados maioritariamente na zona rural. As concellerías de Seguridade Cidadá, presidida polo edil Román Romero, e Medio Ambiente, á fronte da que está o concelleiro Santiago Galego, anunciaron esta medida tras detectarse nas últimas semanas novos puntos ilegais donde se depositaron diferentes materiais e enseres, algúns dos cales xa se limparon e outros que se está procedendo a limpar. O edil de Medio Ambiente recordou que dende o Concello se levaron a cabo recentemente varias campañas de sensibilización e concienciación cidadá sobre a importancia do coidado do medio ambiente e de fomentar a reciclaxe, nas que participou persoal técnico e abertas á cidadanía. Así mesmo, indicou Galego, “fixemos un traballo de mapeo para detectar puntos de vertedeiros incontrolados e posteriormente organizamos saídas para retirar e clasificar os residuos que se atoparon e levalos a un xestor autorizado". Galego explicou que nos últimos vertedoiros incontrolados localizados en San Mateo e no Val atopáronse varias televisións, conxeladores, mobiliario, pezas metálicas de gran tamaño, entullos de obras e outros materiais. “Nalgún caso, ao agravante de depositalo nas inmediacións de pistas rurais, atopamos un caso no que os residuos estaban directamente nun regato, concretamente no Vespasante, tupindo a canalización que discurría baixo a propia pista, co risco que isto supón a nivel medioambiental e de seguridade”, recalcou Galego. A ordenanza en vigor no Concello contempla sancións de ata 3.000 euros para os casos calificados como “moi graves”, que valora a Policía de Medio Ambiente, pero aqueles que se tramiten a través da lei autonómica de residuos, os expedientes remítense á Xunta de Galicia –ao non ser competencia municipal- e as sancións poden superar os 30.000 euros. “Facemos un chamamento á veciñanza para que estea alerta ante este tipo de condutas incívicas e que no caso de presencialas as denuncie pertinentemente para poder actuar e sancionar aos infractores”, apuntou Galego. Sobre os últimos vertidos localizados na zona rural o edil asegurou que “estanse investigando polas características particulares de cada un deles”. Os edís naroneses recordaron que o Concello ten a disposición da veciñanza as instalacións do Punto Limpo municipal de Río do Pozo (operativo de luns a venres, en horario de 9.00 a 13.00 e dende as 16.00 ata as 19.00 horas e os sábados de 9.00 a 14.00) e tamén Servizo de recollida de enseres, co que se pode concertar a recollida chamando ao número de teléfono: 981 391 074.