Narón, 18 de setembro de 2020. A alcaldesa da cidade, Marián Ferreiro, presidiu a reunión que tivo lugar esta mañá no Concello con representantes do comité de empresa da empresa Siemens Gamesa, con sede no municipio das Somozas. Á convocatoria acudiron representantes de todos os grupos políticos da corporación local que no transcurso da mesma escoitaron as reivindicacións do colectivo. O presidente do comité de empresa de Siemens Gamesa en As Somozas, Sergio López, trasladou aos representantes da corporación local a súa preocupación polo incerto futuro da planta das Somozas, con carga de traballo comprometida ata finais de ano para os seus trescentos empregados. A compra por parte de Siemens Gamesa dunha nova planta en Portugal, donde se están realizando novos modelos de palas para aeroxeradores e realizando investimentos alerta ao comité sobre unha posible deslocalización da compañía ao país luso. Asegurou que “se non se realizan investimentos na planta das Somozas quedará obsoleta”. Dende o comité lamentaron “a falta de vontade da empresa para dialogar sobre esta situación e tratar de garantir o futuro desta planta” e acusaron á empresa de “non estar poñendo nada da súa parte para atender as necesidades da compañía e garantir o seu futuro nas Somozas”. A alcaldesa trasladou o apoio da corporación local ao colectivo e anunciou, tras así acordalo co resto de grupos da corporación local, que levarán unha declaración institucional ao pleno do vindeiro xoves, día 24, para amosar o seu apoio ás reivindicacións do colectivo.