Narón, 19 de xaneiro de 2021. Un total de 61 persoas que realizaron cursos do Programa Municipal de Formación e Cemit que remataron nos meses de novembro e decembro do pasado ano poden recoller os seus diplomas. A concelleira responsable da área, Natalia Hermida, recordou que “debido á actual situación sanitaria non podemos entregalos conxuntamente, polo que xa se citou ao alumnado para entregarllos individualmente”. Os 48 diplomas correspondentes ás accións formativas de Carnizaría-Chacinaría; Xestión de almacén-Loxística; Reposición e caixa; Produción ecolóxica e comercialización; Servizos básicos de restaurante e bar e Instalación de parqué e tarima. Lixado e vernizado entregaranse nas instalacións do Centro Municipal de Formación Irmás Froilaz, na Gándara. En canto aos restantes 13 diplomas dos cursos Cemit de Preparación para o CODIX, Trámites en Sede Electrónica e Ofimática Básica, realizados na Aula Cemit de Xuvia, entregaranse no Servizo Sociocomunitario, no primeiro andar do Concello. “En total impartíronse a través deses cursos preto de 2.200 horas de formación a persoas de Narón, ofrecendo unha oferta moi diversificada e que abrangue diferentes sectores e tamén nalgúns casos con formación práctica para o que novamente agradecemos dende o Concello a colaboración das empresas”, subliñou a edil naronesa.