Narón, 16 de novembro de 2021. O Pazo da Cultura de Narón acolle hoxe e mañá un novo espectáculo da “37 Mostra de Teatro Infantil e Xuvenil” organizada polo Padroado da Cultura de Narón, en colaboración coa Deputación da Coruña. Un total de 1.478 escolares de quinto e sexto curso de Primaria e de primeiro e segundo da ESO desprazaranse hoxe e mañá ao Pazo para ver a obra “Rosalía”, de Culturactiva. Tanto hoxe como mañá haberá dous pases, ás 10.00 e ás 12.00 horas. Na xornada de hoxe asistiu á Mostra alumnado dos colexios da Solaina, Virxe do Mar, Ponte de Xuvia, Piñeiros, Jorge Juan, A Gándara e do IES As Telleiras. Mañá acudirán menores do Juan de Lángara, Lestonnac, Rodolfo Ucha, Isaac Peral e Catabois (Ferrol), O Feal (Narón), Maciñeira (Neda), Xunqueira (Fene), Unión Mugardesa (Mugardos) e As Mirandas (Ares). A protagonista desta obra é Rosalía, esa muller que aínda non precisaba apelidarse Castro e que está a piques de marchar a Santiago. Na obra cóntase aos rapaces e rapazas que a infancia é o lugar onde medran as poetas. A vindeira semana programouse para os días 24, 25 e 26 de novembro a representación da obra “Pinocho”, da compañía Ghazafelhos. O espectáculo é unha adaptación libre da obra de Carlo Collodi realizada por Pepablo Patinho. A posta en escena combina os monicreques, o teatro e a música en directo para narrar unha emocionante aventura que amosará un camiño cheo de humor e sensibilidade. Acudirá neses tres días alumnado de primeiro a cuarto curso de Primaria da Solaina, Virxe do Mar, Ponte de Xuvia, Piñeiros, Santiago Apóstol, e o Feal, de Narón e, doutros concellos da comarca, do Juan de Lángara, Xunqueira, Virxe da Cela (Monfero), As Mirandas, Unión Mugardesa, Maciñeira (Neda) e Franza (Mugardos). Este ano representaranse un total de cinco espectáculos para escolares de centros de Narón e comarca: “De aquí para alá”, de Lydia Botana, que puido ver no Auditorio Municipal do 2 ao 5 de novembro alumnado de 3 a 5 anos; “Me llamo Suleimán”, de Unahoramentos Producciones, no Pazo e para menores de terceiro e cuarto de ESO e primerio e segundo de Bacharelato os pasados 9 e 10 de novembro; “Rosalía”, de Culturactiva para escolares de quinto e sexto de Primaria e primeiro e segundo da ESO, que se representará hoxe e mañá no Pazo; “Pinocho”, de Ghazafelhos, para alumnado de primeiro e cuarto de Primaria, que se representará o 24, 25 e 26 de novembro no Pazo. Finalmente, os días 30 de novembro e 1, 2 e 3 de decembro as nenas e nenos das escolas infantís municipais de Piñeiros, A Solaina e A Gándara e da unidade de Infantil do CPR Santiago Apóstol verán nos seus centros “Nube, nube, sol”, de Teatro ao Cubo. Trátase neste caso dun espectáculo cargado de diversión e aprendizaxe, pensado para achegar á primeira infancia a maxia dos ciclos da natureza e a importancia da choiva para que todo medre. A programación da 37 edición da Motix chegará a preto de 4.500 escolares de Narón e comarca unha vez rematada esta mostra