Concello de Narón
  • Concello de Narón
  • El tiempo en Narón
  • Entrada a Naronmail
Noticias
O GRUPO DE GOBERNO LEVARÁ AO PLENO UNHA MOCIÓN DA CIG CONTRA A POBREZA ENERXÉTICA
O documento da central sindical insta á Xunta a impulsar medidas que garantan a enerxía como servizo público
Narón, 4 de setembro de 2015.- O secretario xeral de Terra Galega e concelleiro de Seguridade Cidadá e Transporte Público de Narón, Guillermo Sánchez Fojo, e o portavoz municipal do BNG, Pablo Villamar, reuníronse co cosecretario comarcal da CIG, Manel Grandal, e o integrante da Federación Comarcal de Industria no mencionado sindicato, Alberte Amado, para analizar a viabilidade de presentar no vindeiro pleno unha moción promovida por esta central sindical sobre a proposición de lei que impulsa por Iniciativa Lexislativa Popular (ILP) na que se recollen unha serie de medidas para garantir a enerxía como servizo público e contra a pobreza enerxética. Sánchez Fojo e Villamar indicaron que as formacións ás que representan, Terra Galega e BNG, respectivamente, apoiarán este documento e avanzaron que se porán en contacto co resto de grupos da corporación local para que se sumen á proposta da CIG antes de levar a moción ao pleno municipal para, posteriormente, trasladar o respaldo a esta ILP ao Parlamento Galego e recabar o apoio da veciñanza á mesma. Na moción incídese en que a “imposición no Estado español dun criterio dun sistema eléctrico único e de tarifa única é perxudicial para Galicia, ao tratar por igual aos consumidores dos diferentes territorios, sen ter en conta a súa achega como produtores de enerxía”. A CIG denuncia que as actuais tarifas eléctricas “son as terceiras máis caras para o consumo doméstico e as oitavas para o industrial, segundo unha comparativa de Eurosat sobre trinta estados europeos”. A central incide ademais en que en Galicia a tarifa debería ter unha bonificación dun 30% nas peaxes e apostar por unha de carácter industrial estable e predecible para incrementar o atractivo do territorio para o implantamento industrial, co que a proposta suporía en canto á xeración de riqueza e emprego. A CIG apunta tamén que en Galicia cerca de 187.000 persoas, o que representa o 18% do total da poboación, teñen dificultades para aboar as súas facturas enerxéticas, situación que a central califica de “intolerable nunha sociedade socialmente avanzada”. No apartado das medidas para garantir a enerxía como servizo público para o desenvolvemento económico e industrial de Galicia na moción recóllense propostas como a implantación de medidas encamiñadas á participación da Xunta no aproveitamento público de todos os recursos enerxético e instalacións de produción, distribución e transporte existentes no país; dunha tarifa eléctrica máis baixa; da inclusión de Galicia no actual Plano Estatal do Carbón e a diversificación das fontes de enerxía, entre outras propostas. En canto á erradicación da pobreza enerxética no país, desde a CIG proponse que sexa a Xunta a administración que asuma o custo das facturas de gas e electricidade das persoas consumidoras vulnerables en risco de pobreza enerxética e que acorde coas empresas subministradoras dos servizos os mecanismos de intercambio de información e de prezos sociais, así como a facilitar información actualizada sobre tarifas sociais e axudas e medidas previstas para frear a pobreza enerxética.

<<< Marzo 2024 >>>

LMMXVSD
 
1
2
3
4
5
6
7
8
9
10
11
12
13
14
15
16
17
18
19
20
21 22
23
24
25
26
27
28
29
30
31
Eventos do Concello
naron.gal