Narón, 23 de decembro de 2015. Boa parte dos actos da programación de Nadal deseñada polo Concello desenvolveranse durante os vindeiros días no termo municipal. A primeira das citas desta semana será o día 24 de decembro, xornada na que os nenos e nenas poderán gozar dunha gran Festa Infantil que se celebrará na Praza de Galicia desde as 16.00 ata as 20.00 horas, na que non faltarán os xogos, os inchables e a música. Para completar a convocatoria, ás 18.30 horas chegará Papa Noel á festa, que conversará animadamente cos máis pequenos da casa. As actividades que se sucederán nos vindeiros días están organizadas polas concellerías de Festas e de Ensino, á fronte das que están as edís Mar Gómez e Mercedes Taibo. A programación continuará o día 25 na praza do antigo Concello, en Xuvia, cun concerto instrumental de panxoliñas para ambientar o Nadal que dará comezo ás 11.00 horas. Esa mesma ubicación será na que se atopen os particulares personaxes dos Minions entre as 11.00 e as 13.00 horas, tempo no que se divertirán bailando ao ritmo da animada música e fotografiándose con todos cantos queiran inmortalizar o momento. Na xornada do sábado, día 26, terá lugar o Narón Rock Festival. Esta cita musical será na Praza de Galicia, a partir das 21.30 horas, e na mesma sucederanse as actuacións dos grupos La piel del oso, Pölisong, Barrock, Riff Raff e Los Claretes. Tamén o sábado terá lugar no Pazo da Cultura o tradicional concerto de Fin de Ano da Banda de Música de Sementeira, a partir das 19.30 horas. O domingo, día 27, continuará a actividade na Praza de Galicia, onde estará a familia ao completo dos Bolechas –formada por seis irmáns e o seu can, Chispa- que xunto cos nenos e nenas gozarán de diversas actividades – obradoiros de debuxo, cine, ludoteca, música- entre as 17.00 e as 19.00 horas. Ao longo da tarde sortearanse varios agasallos destes recoñecidos personaxes entre os asistentes para premiar a súa participación neste evento festivo. O luns día 28, entre as 18.00 e as 19.00 horas terá lugar a actividade “O Nadal coas Maimiñas”, con Mai e Miña, dúas amigas que viven un sinfín de aventuras con Zalo, un caballo que soña con deixar de ser un animal. Trátase dun espectáculo musical dirixido a nenos e nenas de 0 a 10 anos e ás súas familias.