Narón, 1 de abril de 2017. A Escola de Teatro do Padroado da Cultura de Narón lamenta fondamente o falecemento do actor Mateo González, de 35 anos e que foi alumno da citada Escola. “Con fonda dor temos que despedir a Mateo González, que rematou este tramo do camiño. No corazón da Escola de Teatro do Padroado da Cultura fican a súa lecidia e a súa xenerosidade”, recordan. Desde o Concello de Narón e a citada Escola trasladan as máis sentidas condolencias polo pasamento de Mateo González á súa familia e amigos, así como aos seus veciños e veciñas da súa vila natal, Pontedeume. Así mesmo, desde a Escola de Teatro lembran “o moito que lle gustaba actuar e o pracer que sentía vendo brillar na actuación aos seus compañeiros e compañeiras de escena”. Finalmente, inciden en que “gardaremos como un tesouro o amor que lle temos, porque se foi un de nós, “un da Escola”, pero como ben sabemos nela, nunca ninguén se vai de todo”.