Narón, 19 de decembro de 2017. Uns seiscentos escolares de segundo ciclo de educación Infantil asistiron nos últimos días a unha sesión de contacontos organizada pola Concellería de Ensino, que preside a edil Mercedes Taibo, e que se desenvolveu nos propios centros. Raquel Queizás foi a encargada de animar aos menores co espectáculo Cocorocó, que hoxe se puido ver nas instalacións do CPR Jorge Juan, a partir das 10.00 e do CPI do Feal, a partir das 12.15 horas. A edil naronesa visitou ás nenas e nenos do colexio do Feal que asistiron á convocatoria, na que se implicaron activamente interactuando con Raquel Queizás durante todo o espectáculo. “É precisamente a interacción dos menores o que queremos potenciar con este tipo de actividades, lúdicas pero ao mesmo tempo cun importante compoñente didáctico en canto que tamén espertan a súa imaxinación”, explicou Taibo. As sesións de contacontos de Raquel Queizás comezaron a desenvolverse o pasado 11 de decembro nos CEIP da Gándara e Virxe do Mar e continuaron o día 12 no CEIP Piñeiros, no CRA de Domirón e no CPR Santiago Apóstol; o 13 no CPR Ayala e no CEIP A Solaina e o 18 nos CRA de Pedroso e o Val. Cocorocó é un espectáculo de narración oral dirixido a público infantil e familiar. Durante case unha hora o público, neste caso os escolares naroneses, tiveron a oportunidade de divertirse coas historias dunha peculiar galiña de cor azul que pon ovos de cores e que vivirá unha serie de aventuras acompañada por outros divertidos personaxes.