Narón, 29 de maio de 2018. O Concello de Narón adxudicou en 39.269 euros os traballos de montaxe dun novo parque infantil en Piñeiros. A empresa Jardinería Arce será a encargada de acometer esta intervención, cofinanciada con cargo ao POS+ 2017 da Deputación da Coruña e con un prazo de execución de tres meses, tal e como apuntou o concelleiro de Servizos, Ibán Santalla. “Este proxecto que se iniciará próximamente en Piñeiros vén a sumarse a un plan integral de renovación e dotación de parques nos diferentes barrios e parroquias da cidade, co fin de ofrecer novos servizos ás nosas veciñas e veciños e de mellorar os xa existentes”, explicou Santalla. O parque infantil ubicarase nas inmediacións da igrexa de Piñeiros, preto do biosaudable –que será obxecto dalgunhas reformas- e unha vez rematado suporá unha superficie de lecer, conxunta, de 265 metros cadrados. As novas instalacións terán tres zonas diferenciadas: unha multixogo, columpios e unha rede trepadora. A zona multixogos consta de dúas torres con cuberta e concíbese como un área de xogo para nenas e nenos maiores de tres anos, con capacidade para preto de corenta usuarios/as. No que respecta ao columpio, será mixto, cun asento con cueiro e outro plano, para menores de 0 a 14 anos e, por último, a rede trepadora fixa, para maiores de 3 anos, que ten capacidade para unha decena de menores. “Coa adxudicación dos traballos deste novo parque na cidade, concretamente en Piñeiros, o goberno local atende unha das demandas formuladas polas veciñas e veciños da zona, donde residen unhas sete mil persoas que, nos vindeiros meses, grazas a esta actuación, poderán disfrutar de novos servizos ao carón das súas casas”, subliñou Santalla. “Nos vindeiros meses continuaremos traballando nesta mesma liña, coidando o mantemento dos máis de sesenta parques cos que conta a cidade na zona urbana e rural e incrementando esta cantidade na medida do posible”, apuntou o edil de Servizos.