Narón, 28 de setembro de 2018. A alcaldesa da cidade, Marián Ferreiro asinou esta mañá convenios con entidades que traballan nas áreas de Promoción Social, Saúde, Ensino e Participación Cidadá por un importe conxunto de 49.000 euros. Ferreiro estivo acompañada no acto polas edís de Formación, Natalia Hermida; Ensino, Mercedes Taibo; Participación Cidadá, Catalina García, e Promoción Social, Teresa Sabio, ademais de representantes das entidades coas que se asinaron os acordos, que en dous casos non supoñen contías económicas senón a cesión de uso temporal de instalacións municipais. Os directores dos institutos das Telleiras, María Esther Pereiro, e de Canido, Manuel Pardo, poderán utilizar en base ao convenio rubricado, as instalacións do Centro Municipal de Formación Irmás Froilaz, na Gándara, para desenvolver actividades relacionadas co taller de Carpintería e moble, no caso do IES As Telleiras, e para o taller de Restauración e bar, no do IES Canido. En canto aos convenios con achegas económicas, asináronse os correspondentes á Asociación Ferrolana de Drogodependencia, que preside Rosario Alabau; da Fundación Ingada, con María Elvira Ferrer como vicepresidenta; Asociación Síndrome de Down Teima, presidida por Patricia Serantes; a Fundación Santo Hospital de Caridade, cuxo presidente e Irmán maior é Alberto Manuel Lens; a Asociación Sociocultural ASCM, presidida por Paula Gárate; a Asociación Párkinson Ferrol, con Vanesa López como presidenta; a Asociación Galega de Transplantados de Médula Ósea, presidida por Cristina Piñeiro; a Asociación de Loita contra os malos tratos, presidida por Paula Calvo; a Asociación Bbtta, con Susana Piñeiro como presidenta, e a Asociación de Pais e Nais de Nenos con Minusvalía, presidida por Montserrat Fraga. Ferreiro destacou o labor que, nas súas respectivas áreas, realizan as entidades, “e que redunda nun importante beneficio para as veciñas e veciños de Narón, e nalgúns casos tamén doutros concellos, que poden acceder a programas, accións formativas e actividades específicas para determinados colectivos”. Pola súa banda os representantes das entidades agradeceron a colaboración do goberno local pola súa colaboración a través destes acordos. A alcaldesa e as edís da corporación local agradeceron aos representantes das asociacións o traballo que realizan a diario e comprometeron o respaldo do Concello.