O Concelleiro de Servizos, Pablo Mauriz, fixou o remate das obras de San Mateo para finais deste mes, sempre que o permitan as condicións metereolóxicas. Mauriz afirmou que o Concello está a punto de rematar o firme das pistas, e apelou a comprensión dos veciños que teñen que sufrir temporalmente as molestias derivadas do acondicionamento das melloras no saneamento. O vindeiro día 19 está previsto empezar o aglomerado das devanditas pistas, aínda que podería retrasarse no caso de que haxa chuvia, xa que o procedemento precisa tempo seco durante uns días. Asemade, o Edil anunciou que en aproximadamente 15 días comezarán os traballos para levar os servizos de auga e sumidoiros ós veciños de Pedroso. Beneficiaranse das obras de saneamento 135 vivendas. Será xa nos meses de abril e maio, cando se conectarán as obras de saneamento á depuradora que xa posúe a parroquia. Mauriz recalcou que os veciños non son nunca perxudicados polo saneamento, senón beneficiados, aínda que teñan que sufrir pequenos contratempos temporais por culpa das obras.