O Padroado da Cultura de Narón colabora coa Sociedade Cultural Areosa na organización do evento, que será o domingo 7 de abril
Narón, 4 de abril de 2019. O Padroado da Cultura de Narón colabora un ano máis coa Sociedade Cultural Areosa, de Piñeiros, na organización do Certame de Habaneras de Narón. A cita, que alcanza este ano a súa décimo sétima edición, terá lugar o vindeiro domingo, día 7, nas instalacións do Auditorio municipal, a partir das 18.00 horas.
A Rondalla Mugardesa (Mugardos), a Agrupación Musical de Vincios (Gondomar), a Coral de Cesullas (Cabana de Bergantiños) e a Coral da Sociedade Cultural Areosa (Narón) son as formacións que actuarán nesta edición do Certame de Habaneras, tal e como avanzou a concelleira de Cultura, María del Carmen Espada.
A entrada ao certame é de balde, podendo asistir todas as persoas que o desexen ata completar o aforo do Auditorio municipal.