A cita cambia de ubicación e desenvolverase na Praza de Galicia, en horario de mañá e tarde, e a maiores dos postos de venda haberá varios obradoiros abertos á cidadanía, tal e como explicou o edil de Feiras e Mercados, Santiago Galego
Narón, 12 de decembro de 2019. A Praza de Galicia acollerá este domingo, día 15, a undécima edición do “Mercado de 2ª Man” organizado polo Concello de Narón. O concelleiro de Feiras e Mercados, Santiago Galego, avanzou que participarán na convocatoria un total de 60 postos nos que se venderán unha gran variedade de artículos de segunda man. O edil naronés agradeceu a confianza depositada polas persoas que participarán no evento, algunhas delas fieis a esta cita.
“É moi importante este mercado porque ten unha vinculación directa co medio ambiente, porque a xente ao desfacerse destes produtos e obxectos de segunda man que deixan de serlles útiles unha das saídas é este mercado, porque outra saída natural sería pasar a ser un residuo”, explicou Galego.
O “Mercado de 2ª Man" estará operativo baixo unha gran carpa en horario de 10.30 a 14.00 e de 16.00 a 19.00 horas, tal e como indicou o edil naronés. Así mesmo, recordou que se celebrarán catro obradoiros, un que comezará ás 10.30 horas sobre elaboración de maceteiros con botellas de plástico e outro a partir das 12.30 para aprender a elaborar marionetas con calcetíns. Pola tarde retomaranse estes obradoiros ás 16.00 horas, elaborando bonecos de neve en tarros de cristal e ás 17.30 horas dará comezo outro sobre reciclaxe de camisetas usadas, para o que as persoas interesadas en participar deben levar as súas propias camisetas (no resto de obradoiros ofrecerase o material preciso).
As persoas que realicen compras neste mercado recibirán unhas papeletas coas que optarán ao sorteo de dúas cestas con productos de Nadal.
Galego convidou ás veciñas e veciños a achegarse a esta cita, consolidada xa na cidade, e na que poderán ver unha gran variedade de artículos de segunda man e tamén participar nos catro obradoiros programados, todos eles de balde. A maiores, tamén haberá un espazo delimitado para recoller doazóns de alimentos non perecedoiros que se entregarán ao Centro de Recursos Solidarios de Narón.