Narón, 15 de novembro de 2020. O Concello quere amosar publicamente a súa solidariedade co pobo saharauí tras romper acordo do cesamento do fogo entre os saharauís e Marrocos, as dúas partes implicadas no conflicto do Sahara Occidental, quedando anulado o pasado venres ese acordo de non agresión asinado entre as partes no ano 1991 á espera de celebrar un referéndum de autodeterminación para o Sahara. As forzas armadas de Marrocos desplegáronse antonte en Guerguerat, na fronteira con Mauritania, para desbloquear a zona, donde dende hai preto dun mes se manifestaban activistas saharauis que reclamaban pacificamente a retirada das tropas de Rabat. Este feito foi considerado pola Fronte Polisaria como unha violación do cesamento do fogo, declarando posteriormente a guerra. Dende o Concello naronés incidiuse no dereito do pobo saharaui á plena autodeterminación e urxiuse o cumprimento dos Plans de paz das Nacións Unidas, reclamando a súa intervención para solventar de xeito pacífico e definitivo este conflicto, respectando o cesamento do fogo e evitando calquera tipo de violencia. “O feito de que se declare a guerra porá nunha grave situación á poboación civil saharaui, co risco que iso supón para un pobo que sobrevive nunhas condicións dramáticas e co que o noso Concello mantén dende hai moitos anos un vínculo especial, a través do programa Vacacións en Paz, que permitiu traer a Narón e a outros concellos do país a nenas e nenos dos campamentos de refuxiados de Tinduf grazas á solidariedade de moitas familias”.