Narón, 18 de novembro de 2020. Ao longo dos meses de novembro e decembro, o Concello de Narón desenvolverá unha serie de actuacións dirixidas á promoción do sector da hostalería e a poñer en valor a riqueza deste territorio e, nomeadamente, a da nosa ría, a través do proxecto “Narón, produtos da ría”. O edil de Promoción Económica, David Pita, asegurou que “temos unha ría moi rica en especies comerciais de gran calidade. Queremos seguir poñendo en valor as nosas potencialidades e para iso é imprescindible artellar as accións en estreita colaboración co sector hostaleiro naronés, cun alto grao de participación nas diferentes actividades propostas formuladas por parte da institución local’. O plan de acción reorientouse e adaptouse ao contexto da Covid-19 por prevención e seguridade, reformulando as propostas e as actuacións promocionais do sector, incluíndo ítems comunicacionais dirixidos aos diferentes públicos obxectivos. A acción máis inmediata desenvolverase a partir da vindeira semana e consistirá na gravación de varias vídeo-receitas coas propostas preparadas in situ polos responsables de cociña de distintos establecementos naroneses que se queiran sumar á iniciativa, podendo anotarse ata o 26 de novembro. A finalidade é a produción dun audiovisual que permitirá ofrecer a mellor imaxe posible do sector, en base aos produtos da ría a exaltar nesta edición 2020 que son a ameixa rubia, o berberecho, o carneiro, a ostra salvaxe e a zamburiña. Ademais dos cociñeiros locais, participarán nesta gravación de cara ao produto audiovisual final dous cociñeiros de recoñecido prestixio: Beatriz Sotelo e Iñaki Bretal, influíntes chefs galegos que achegarán a súa creatividade. A segunda acción a desenvolver é un Concurso de Receitas dirixido á poboación en xeral, de cara a impulsar a cociña autóctona a través dos produtos de calidade do mar, nomeadamente os cinco produtos estrela antes nomeados que protagonizan a campaña. Poderán presentarse ao certame afeccionados á cociña, que deberán enviar unha receita por persoa, utilizando algún deses mariscos da ría como ingrediente principal. A receita cos ingredientes e a preparación descrita deberá entregarse dende mañá ata o 3 de decembro. Na valoración das receitas terase en conta a dificultade, o número de ingredientes, a orixinalidade ou a presentación e o emprego das máximas e dos obxectivos propostos polo concurso. De entre todas as receitas recibidas, os autores das seis finalistas recibirán seis bonos-agasallo consistentes noutros tantos menús degustación por valor de 60 euros cada un, a consumir nos establecementos participantes no apartado audiovisual. Todos os participantes recibirán un agasallo e entrarán no sorteo de varios lotes de produtos frescos das confrarías. Como remate da campaña de promoción, desenvolverase o foro "A produción marisqueira na ría" o venres 4 de decembro de 17.30 a 18.30 horas no Café Teatro do Pazo da Cultura, ata completar o aforo do Pazo. Neste caso farase en formato reducido e emitido en “streaming”, coa participación como relatores de profesionais do sector, biólogos, confraría e mariscadores, e un representante da Estación de Bioloxía Mariña da Graña. A inscrición para participar en calquera das tres actividades, de balde, faise a través do teléfono 981 337 700 (extensión 1316) ou o do correo electrónico: promocioneconomica@naron.es.