Ofértanse unha variedade de programas terapéuticos, artísticos, culturais, de formación, e lúdicos.
Narón, 26 de Agosto de 2009.- A Concellería de Maiores de Narón, dirixida pola edila Mª del Carmen Espada, mantén aberto o prazo de matrícula para participar nas actividades do programa municipal de atención ás persoas maiores 2009-2010. Esta convocatoria pecharase no momento en que se cubran as prazas dispoñibles, que varían dependendo da actividade a realizar.
A oferta de actividades para Maiores do Concello de Narón é a seguinte:
-Actividades de carácter terapéutico: ximnasia rehabilitadora, ioga, obradoiro de memoria, e obradoiro de psicomotricidade.
-Actividades artísticas (ocupacionais): obradoiros de manuais e obradoiros de labores.
-Actividades de carácter cultural: grupo de publicacións e exposicións, lecturas vivas e debates.
-Actividades de carácter formativo: curso de comunicación, apoio á informática, obradoiros formativos, e obradoiros de lecto-escritura.
-Actividades de carácter lúdico: festivais, bailes latinos e de animación, guateque latino, e cancións de animación.
Ademáis, a Concellería de Maiores promove outro tipo de iniciativas coma as actuacións do grupo de Cancións e do grupo de Baile en diferentes lugares do concello –a modo de obradoiros interactivos- coma as Escolas Infantís Municipais, as residencias xerontolóxicas, e os clubes e asociacións do Concello. Tamén se realizan murais conmemorativos, coincidindo cunha data sinalada en cada mes.
Todas estas actividades teñen como único obxectivo, segundo apuntou a Concelleira da área, Mª del Carmen Espada, “mellorar a calidade de vida das persoas maiores, promocionando o envellecemento activo e propiciando a participación dos maiores en tódolos ámbitos da vida social, poñendo en valor tódalas súas aportacións”, declarou.