Narón, 26 de xaneiro de 2021. Un total de dezanove empresas presentaron no Concello as súas respectivas ofertas para acometer o proxecto de mellora enerxética nas instalacións do Centro Municipal de Formación Irmás Froilaz, na Gándara. Así o avanzou a alcaldesa da cidade, Marián Ferreiro, que recordou que esta actuación licitouse en 372.063 euros, unha contía que se cofinanciará con cargo ás subvencións do programa europeo Feder. O prazo de execución dos traballos previstos é de cinco meses dende a adxudicación. Ferreiro anunciou que o vindeiro luns, día 1 de febreiro, terá lugar a primeira reunión da Mesa de Contratación para abrir as ofertas presentadas polas diferentes compañías. A actuación que se acometerá no Centro Irmás Froilaz permitirá mellorar as condicións térmicas de habitabilidade do edificio, así como a súa eficiencia enerxética. Os traballos executaranse nas catro fachadas da construción, nas que se instalará un novo sistema de aillamento e donde tamén se substituirá a cubrición de fibrocemento da cuberta por outra de panel sándwich de chapa. A maiores, tal e como se contempla no proxecto, cambiaranse os canelóns e baixantes e tamén as ventás do edificio ubicadas nas zonas non reformadas, na fachada oeste. O resto de fiestras da edificación renováronse con cargo a anteriores proxectos materializados dende o Consistorio. Dos 372.063 euros que custará esta intervención unha partida de 297.651 euros sufragarase con cargo ao programa Feder, se ben os 74.412 restantes abonaranse dende as arcas municipais, tal e como apuntou a rexedora local. O Concello tamén recibiu con cargo a estes fondos europeos –solicitados a través do Ministerio de Transición Ecolóxica- unha subvención para renovar alumeado público no termo municipal, orzamentado en 283.295 euros, dos que 226.636 procederán do Plan Feder e os restantes 56.659 do Concello. A actuación complementará os investimentos que dende as arcas locais se están realizando nos últimos anos para mellorar a eficiencia enerxética e permitirá renovar uns 430 puntos de luz ubicados en áreas de interconexión entre zonas industriais e zonas urbanas, así como viais de acceso xeral entre núcleos. Entre eles están as vías de acceso aos tres polígonos industriais da cidade (Río do Pozo, A Gándara e As Lagoas); a estrada da Gándara, as inmediacións do colexio Santiago Apóstol, Cornido, a zona de Outeiro-Piñeiros; Río Seco, rúa Bimbieiro… Ferreiro recordou que o Concello de Narón solicitou estas dúas subvencións ao Ministerio de Transición Ecolóxica, a través do Instituto para a Diversificación e o Aforro da Enerxía (IDAE). As axudas diríxense a proxectos singulares de entidades locais que favorezan o paso a unha economía baixa en carbono. “Trátase de dúas subvencións que nos vindeiros meses nos permitirán acometer na cidade actuacións que mellorarán nun dos casos unhas instalacións municipais e no outro permitirán un considerable aforro e redución da contaminación de dióxido de carbono”, subliñou a alcaldesa.