Narón, 31 de marzo de 2021. A glorieta de Freixeiro permanecerá iluminada de cor azul dende a noite de hoxe ata o domingo día 4 de abril como mostra de apoio e solidariedade ao colectivo de persoas con Trastorno do Espectro do Autismo TEA e súas familias na conmemoración do 2 de abril, Día Mundial de Concienciación sobre o Autismo. O Concello súmase así á iniciativa do movemento internacional "Ligh it up blue” (Ilumínao de azul). A concelleira de Benestar Social e Participación Cidadá, Catalina García, mantivo recentemente unha reunión coa Asociación Aspanaes na que a entidade lle trasladou esta proposta. García valorou o traballo realizado por Aspanaes coas persoas pertencentes ao colectivo TEA e o seu entorno familiar e social, e manifestou a colaboración do Concello para acadar os obxectivos de visibilización, inclusión e solidariedade.