Narón, 5 de abril de 2021. A concelleira de Benestar Social, Catalina García, recordou que mañá martes día 6, ás 14.00 horas, rematará o prazo para participar nunha das actividades organizadas con motivo da conmemoración do Día Internacional do Pobo Xitano. As persoas que o desexen deben enviar un retrato seu cunha frase, como por exemplo “Espazo Libre de racismo”, “Opré Romá!” (en referencia ao tratamento dos medios de comunicación), “Sastipen Thaj Mestipen” (Saúde e Liberdade), ou “Loita contra o antixitanismo; desmonta os prexuízos”, entre outras propostas. O Concello organizou este e outros actos previstos para conmemorar o 8 de abril xunto coa Asociación Familiar Ferrol (AFA). As imaxes deben enviarse ao correo electrónico: minoriasetnicas@afaferrol.org e asinar a autorización de dereitos de imaxe e protección de datos que se poden descargar da páxina web do Concello de Narón, na dirección: www.naron.es. Finalmente o Concello elaborará un vídeo coas fotografías enviadas que se publicará nas redes durante esta semana co cancelo #Narónencaló.