Narón, 23 de agosto de 2021. A concelleira de Estatística, Mar Gómez, reuniuse esta mañá no Concello cunha representación da Asociación veciñal Rosa dos Ventos de Sedes e persoal do citado departamento na administración local para avanzar nas tarefas de nova numeración de vivendas, sinalización de lugares e recuperación de toponimia na parroquia. A edil naronesa destacou e agradeceu a colaboración da AVV e, en xeral, das veciñas e veciños de Sedes, “pola súa implicación e axuda no traballo de campo que require este importante proxecto”. A entidade veciñal da parroquia exporá no local social os planos da zona de Sedes que estarán a disposición dos residentes dos distintos lugares, a partir de mañá e durante un periodo de 15 días, para que os consulten e realicen as aportacións que consideren oportunas, manifestou Gómez. “A colaboración das persoas que viven nos lugares do rural é fundamental para que esta iniciativa finalice cun resultado óptimo. A previsión é rematar estas tarefas, proxectadas en toda a zona rural e semiurbana do Concello, na presente lexislatura”, recordou a responsable da área.